Kɛ' ‑blaa 'de nyɔ 'ɔ 'blee dɩ 'a ‑tɩ' 'ʋn ɛ
15
Nyɔsoa wluɛ Moisɩ ke Aarɔn ‑pee ɛ 'na: 2 ao wlu 'de Israɛ nyʋ ‑pee ao 'da ka: ‑Bo ‑tɔo kpʋn nyɔ jrɔ' ɛ, ɛɛ' "ni ‑a ‑sia" "kpae mɛ ‑ɛɛ nʋɛ' -wɛe ɔ se i ‑kwɛ. 3 ‑Bo ɛɛ' "ni a jea 'wla, 'dewlɛ ‑bo ɛ kan ɔ "i o, ɔ se i ‑kwɛ. 4 Dɛ "klein ɔ 'pɛan "kpei ke dɛ "klein ɔ ‑tea ''kpei se i ‑kwɛ. 5 Nyɔ ‑ɔ mua ɔɔ' ''kpei 'pɛndɛ- "i blaa' a muɛ ɔɔ' "wliiɛ‑ wɔɔa', ‑wɛe ɔ 'je jre 'de "niɔ-, ɔ se i ‑kwɛ i mamaʋ 'sʋ ‑kwie" ka-. 6 Nyɔ ‑ɔɔ mua ɔɔ' ''kpei ‑tedɛ "kpei ‑tea' a muɛ ɔɔ' "wliiɛ‑ wɔɔa', ‑wɛe ɔ 'je jre 'de "niɔ-, ɔ se i ‑kwɛ i mamaʋ 'sʋ ‑kwie" ka-. 7 Nyɔ ‑ɔ mua 'wɛnʋɩ ‑nɔ "i blaa' a muɛ ɔɔ' "wliiɛ‑ wɔɔa', ɔ 'je jre 'de "niɔ-, ‑wɛe ɔ se i ‑kwɛ i mamaʋ 'sʋ ‑kwie" ka-. 8 ‑Bo 'wɛnʋɩ ‑nɔ po tɔn 'de nyɔ ‑kwɛai ''kpei ɛ, ‑mɔ ɔ muɛ ɔɔ' "wliiɛ‑ wɔɔa', ɔɔ muɛ jrea' 'de "niɔ ‑wɛe ɔ se i ‑kwɛ i mamaʋ 'sʋ ‑kwie" ka-. 9 "Kpei ‑tedɛ "klein, ‑ɛɛ ''kpei 'wɛnʋɩ ‑nɔ mua "kpei tea ɔ 'jea dooa' mu ɛ se i ‑kwɛ. 10 Nyɔ "oo nyɔ ‑ɔɔ mua dɛ "oo dɛ ‑tea 'de ɔ ‑sɔn "i blaa', se i ‑kwɛ i mamaʋ 'sʋ ‑kwie" ka-, nyɔ "oo nyɔ ‑ɔɔ mua ɛɛ' dɛtu 'ʋn "dua a muɛ ɔɔ' "wliiɛ‑ wɔɔa', ɔɔ muɛ jrea' 'de "niɔ-, ‑wɛe ɔ se i ‑kwɛ i mamaʋ 'sʋ ‑kwie" ka-. 11 'Wɛnʋɩ ‑nɔ ‑bo ɔ se kwa jre, nyɔ -ɔɔ mua "i blaa' a muɛ ɔɔ' "wliiɛ‑ wɔɔa', ɔɔ muɛ jrea' 'de "niɔ- ‑wɛe ɔ se i ‑kwɛ i, mamaʋ 'sʋ ‑kwie" ka-. 12 Maadɛ foo" ɔɔ mua "i blaa' nyɔ 'jeɛ wa, ‑wɛe dɛfoo" nyʋ nʋa tu 'ʋn, ‑bo ɔ blɛi" ɛ, nyʋ 'je "ni nʋ ɔ 'jeɛ wɔɔ‑.13 ‑Bo "ni 'bɔ ɔ 'ʋn 'wlu -tɩ ɛ, ɔɔ muɛ 'wɩ ‑mɛ" 'sɔn nʋa, mɛ ‑nɩ ɔɔ' i kwɛa 'a 'wɩ, ‑wɛe ɔ 'je ɔɔ' "wlii‑ wɔɔ‑, ɔ 'je jre 'de "ni -gbuu "i, ‑wɛe ɔ 'je i ‑kwɛ. 14 'Wɩ 'a ‑mɛ" na ‑nɛ ɛ, ɔɔ muɛ -gbɛɛ 'sɔɔn, 'dewlɛ "pau 'sɔɔn 'ʋn "dua, ɔɔ muɛ 'e -tan 'tan ‑ɛ ‑sɔn nyʋ ke Nyɔsoa 'a ‑gbʋʋan "i a paana' mua' 'de Nyɔsoa "jʋɛi, ‑wɛe ɔ 'jɩ 'sraa ‑sai "nyɩ. 15 Ɔ mɔ ‑ɔɔ muɩ ɩa' due' dɛsaʋn 'a 'sraa -saa', ‑wɛe due' 'sraa ‑ɛ ‑wee' nɛ dia 'ʋn ‑saa. ‑Wɛe ka nyɔ ɔ nʋa, ‑wɛe nyɔ ɔ dɛsaʋn 'a ‑kwɛa', 'sraa ‑sai nʋ 'kan 'de 'wɛnʋɩ ‑nɔ ‑pʋn" 'de Nyɔsoa "juɛi.
16 ‑Bo "junmɔu 'a "ni ‑te' tɔ' ɛ 'wla a, ɔɔ muɛ jrea' 'de "ni o, ‑wɛe ɔ se i ‑kwɛ i mamaʋ 'sʋ ‑kwie" ka-. 17 "Wliiɛ‑ "klein ɛɛ muɛ "i blaa', ‑bo ɛ nɩ nmiku o, ɛ 'je wɔɔɛ ‑o 'de "ni o, ‑wɛe ɛ se i ‑kwɛ i mamaʋ 'sʋ ‑kwie" ka-. 18 ‑Bo "junmɔu ke 'nynɔkpao ‑te ‑tadue i ɛ, ka ʋʋ nɩa 'sɔɔn, ʋʋa muɛ jrea' 'de "niɔ, ʋʋ se i ‑kwɛ i mamaʋ 'sʋ ‑kwie" ka-.
19 ‑Bo nmɔɔ sea 'e 'nynɔkpao 'ʋn 'wlʋ, dɛ dɛ‑nʋɛ' mɛ ‑nɩa ʋ toɛ kwa "jɛi, nyɔ ɔ muɛ ʋ ja ‑gbʋʋan', ka nyɔ ‑sea i ‑kwɛ nɩa 'de 'wɩ ‑mɛ" 'sɔn 'di. Nyɔ "oo nyɔ ‑ɔɔ mu "i blaa', ɔ se i ‑kwɛ mamaʋ 'sʋ -kwie" ka-. 20 "Kpeipɛndɛ "klein ke, dɛ "klein ʋa ‑tea "kpei ɩ se i ‑kwɛ, 'de nɔ" ‑nɩa 'mʋʋa‑ 'di. 21 Nyɔ "oo nyɔ ‑ɔɔ mua ʋʋa' "kpeipɛndɛ "i blaa', ɔ 'je ɔɔ' "wliiɛ‑ wɔɔ‑, ɔ 'je jre- 'de "ni o ‑wɛe ɔ se i ‑kwɛ i mamaʋ 'sʋ -kwie" ka-. 22 Nyɔ ‑bla' ʋʋa' "kpei -tedɛ "i ɛ, ɔɔ muɛ ɔɔ' "wliiɛ‑ wɔɔa', ɔɔ muɛ jrea' 'de "ni o ‑wɛe ɔ se i ‑kwɛ i, mamaʋ 'sʋ -kwie" ka-. 23 ‑Bo dɛjrɛ' nɩ 'de ʋa "kpeipɛndɛ "kpei 'dewlɛ, 'de dɛ ʋ ‑tea "kpei "kpei ɛ, nyɔ ‑ɔɔ muɛ "i blaa', ɔ se i ‑kwɛ mamaʋ 'sʋ kwie" ka-. 24 ‑Bo ʋ ke "junmɔu a sea ‑tadue i -te ɛ -wɛe ʋa' kwa "jɛi tooa' 'je -tee ɛ, 'de ɛ 'je ɔ "i blaa, -mɛ ɔ se i ‑kwɛ i 'de 'wɩ ‑mɛ" 'sɔn 'di, ‑wɛe "kpeipɛndɛ "klein ɔɔ mua "kpei 'pɛan kpʋn ɛ ‑flɛn".
25 ‑Bo nmɔɔ' 'nynɔkpao 'ʋn 'wlʋa, cɛn ɔɔ' kwa "jɛi tooa' nɔ" "kpei ‑tie" ɛ, ʋ se i ‑kwɛ i 'de nɔ" ‑nɩa 'mʋʋa‑ 'di, ka ʋa kwa "jɛi too nɔ" nɩa 'ka mɔ ɛ nɩ-. 26 "Kpeipɛndɛ ʋa mua "kpei 'pɛan, ɛ ke "kpei -tedɛ "klein ʋa mua "kpei ‑tea', 'de nɔ" ‑nɩa 'mʋʋa‑ 'di, ɩ se i ‑kwɛ ka ʋa' kwa "jɛi to nɔ" nɩa. 27 Nyɔ "oo nyɔ ‑ɔɔ mu "i blaa' ɔ se i ‑kwɛ, ɔɔ muɛ ɔɔ' "wliiɛ‑ wɔɔa', ɔɔ muɛ jrea' ɔ se i ‑kwɛ i mamaʋ 'sʋ -kwie" ka-.
28 ‑Bo nmɔ 'bɔ ʋ 'ʋn 'wlu ‑tɩ ɛ, ʋa muɛ 'wɩ ‑mɛ" 'sɔn ‑sroa', bo ɩ ‑si' ɛ ‑mɛ ʋ ‑kwɛ i. 29 'Wɩ 'a ‑mɛ" na ‑nɛ "kpei ɛ, ʋa muɛ -gbɛɛ 'sɔɔn 'dewlɛ, "pai 'sɔɔn 'ʋn "dua' ʋ 'jeɛ 'sraa ‑sai ja, 'de -tan 'tan ‑ɛ ‑sɔn nyʋ ke Nyɔsoa 'a ‑gbʋʋn' a "i 'a paana'. 30 'Sraa ‑sai 'a muɛ ɩa' due' dɛsaʋn 'a 'sraa 'ʋn ‑saa', ‑wɛe due' 'je 'sraa -ɛ ‑wee' nɛ dia ‑saa, 'sʋ ka nyɔ ɔ nʋa -wɛe nyɔ ɔ -kwɛai ɛ 'ka ɔɔ mu nʋa' 'de 'nynɔkpao -nʋ "kpei 'de nmɔ ‑wlʋa 'de ʋ 'ʋn 'a -tɩ' 'ʋn 'de Nyɔsoa "juɛi.
31 Nyɔsoa 'wlu 'de Moisɩ ke Aarɔn -pee ɛ 'na: Ao 'tmʋʋ Israɛ -nyʋ ʋʋ 'je kɩɩn ‑saa -bo ʋʋ se i -kwɛ ɛ, 'de ʋʋpʋ je 'mɛ, ʋʋ je 'ma "nyɩɩna' ‑nɩa ʋʋpʋ "klu ‑flɛn" kpʋʋ-.